Xbox 360 換機服務

上星期三，趁未有SSFIV，CAPCOM 出左Final Fight Double Impact。唸住開機玩吓試玩版，一心唸住買來玩，點知都未下載完，部機就Hang左。關機再開，終於俾我見到XBOX究極奧義之三紅。我成個人呆左一呆，唔知點算好。天機一算，出機都有三年，好驚無得換。

於是上XBOX 網揾吓有乜方法換，原來係有三種方法：

1）自己攞部機去服務中心，三日後有專人送返你屋企

2）自己攞部機去服務中心，两日後自己去攞返

3）有專人上你屋企攞部機去服務中心，五日後有專人送返你屋企

服務中心：葵涌大連排道202-210號偉倫中心1期5B

a) 首先，要抄底部機嘅Serial No. ，通常係前面USB 位或都機背。仲要記底自己嗰Live ID 或 email address。

b) 跟住打電話去服務中心話你部機三紅，跟住佢問左一大堆問題，會俾個support 號碼你，記住佢呀。。。。

c) 佢會話俾你聽有三種方法換機，問你要邊種方法。我當然好懶咁用第三個方法喇 !

d) 佢約你上門時間，我話星期一。到星期一，有人三十分鐘前打俾我話來攞機。佢地會留底收機紙。記住要拆 harddisk 同攞返係機裏面嘅CD！

e) 都唔使五日，星期三就話有機攞，星期四送上屋企。好正！

本來我好憎微軟，但今次真係抵讚。服務好，快靚正，個support 小姐態度又好，真係好！

仲有一個月金會員送！

話説回來，有錢嘅大公司係唔同啲，做野快好多。我同事話其實你買機佢已經計左喇。XD

新斗記

星期一同公司舊同事吃飯慶祝生日，朋友提議去佐敦正斗記。上開飯喇揾到，但係已經結業同埋係灣仔，我估唔係同一間。於是揾吓佐敦有乜斗記，先揾到新斗記。見人啲評價幾好，於是即刻叫朋友訂枱。

可能上次安排有欠妥善，今次各方好友都好準時到。七點幾已經到齊人啦，重要全部出來，两位小姐嘅生日昧力真大！

我地叫左好多野食呀！成枱都係。

先來頭盆 鴨胸和皮蛋，我唔食皮蛋，所以食左幾片鴨胸，幾香，唔錯。

第一度菜係半隻乳豬，好細隻咁，真係乳豬，無錯！酒樓果啲係老豬！啲皮都好脆，同朋友講左两句野，抬頭一望，幾乎無晒啲皮。乳豬肉就一般，唔係太香。

再來其待已久的粟米石班塊，好正呀，粟米汁和石班塊是分開上的，石班塊好新鮮，好脆。讚！因為太好味，所以叫左碗飯送住來吃。

跟住有鹵水乳鴿皇和白切雞，乳鴿一般，我覺得隻雞都尚可，但朋友就話佢好梅。哈哈。

重有就係豉油皇煎海中蝦，每隻蝦都好大隻，啲殼都好脆，唔講以為食緊軟殼蟹tim。蝦肉好彈牙，好過食龍蝦！

重有就係西湖牛肉羹，牛肉好香！定係有其他野？！

最後終於出我叫嘅咕嚕肉，又係好脆，唔係太酸太甜，好好味，不知不覺食咗四，五舊。WA，啲咕嚕肉裏面有好多肥肉，今次死梗，肥仔喇。好在食到最後先食呢度菜，太飽喇，唔係食唔停口。

仲有係啫啫乜菜煲，好似係生菜 :D。好熱，有啲腐乳味，炒得好香，我唔食菜嘅人都食左幾大條！

仲有其他野食不過我唔記得喇 ～～好似有炒麵，不過無乜驚喜。

埋單每位二佰大元（但係两位壽星女都要俾？我想問係咪佢地唔使，不過好似無人有反應，就算）。我覺得有點貴架，粟米石班塊要九十七蚊，不過好食貴啲OK嘅。

最後要提吓其實啲野度有啲鹹，我地好多人都叫左汽水飲。

呢度有Coke Zero飲架，太好了。Coke Zero樽裝真係好多氣，飲一口啲回流就令到支可樂嘔泡，哈哈！正！

評分：85

�

Kick-ass 勁揪俠

見到hkmovie 啲影評話勁揪俠好睇 (有四粒星），好笑，加埋荃灣百老滙＄35蚊仲要十一點九有早塲，於是今日走左去睇。

故事（改自同名漫畫）講一個傻仔成日唸住扮超人，係網上買左套青BB嘅緊身衣週街去幫人。（點敢著住嗰套野出街呀？？）又無料，幾乎死係黑幫手上，但係遇到hitgirl 同 big-dad 幫手。其實 big-dad 同班黑幫有恩怨，成日搞到黑幫生意做唔成。黑幫大佬同佢個仔（扮red-mist)，big-dad，hitgirl 有一塲大戰。

其實唔係好多塲面好笑（要聽英文先會好笑啲），這方面有啲失望。不過槍戰同打塲面比左心機去做。套戲係三級因為啲打鬥塲面都好血腥吓，我都睇到有啲驚。內容就預左無內涵，無無聊聊，無驚喜。比較好係Chloe Moretz飾演嘅Hitgirl，好多打鬥都做到好好，同最後俾人打到死死吓咁都演得唔錯。另外，我都好鍾意Red-Mist嗰做型！

套戲有啲長得滯，都唔明開頭主角俾人車到飛起有乜用，唔通剩係表達佢係gay? Nicolas Cage 嗰做型好明顯抄batman架喎，唔驚俾人告？相信套戲會有續集，冇乜興趣。

反而睇到IRONMAN 2 預告好吸引，應該會去睇。唔係3D有多啲興趣。

相片來自勁揪俠官網。

評分 ： 60 （如果唔係＄35蚊，我唔會去睇）

單身歧視

前日某報章提到單身人仕問題，我都有感而發，所以寫了這篇網誌。相信好多單身人仕都受過以下的狀況：

老闆話某某有女在家要湊，你單身多啲時間，幫佢搞埋佢。

老闆話某某有女有家室有樓，你單身無負擔，炒左你，你都好易揾嗰份工。

人大左，又揾唔到伴，就俾人話老宅男，中女。

我有以下嘅想法：

我唸我唔使私人時間？我唔使時間去揾女友？我唔使去拍拖？你上左岸就話啫。

我都又無樓，又無錢，我都有老豆，老媽子要養，我都要份工先生活到架。你有仔，有女，有老婆，生活中都有人同你分享分擔唔開心嘅野，我單身都無人陪，屈屈埋埋好易痴線架！

我都唔想單身架，每個單身人仕都有原因揾唔到伴嘅。好似我咁，係自己黃金時間隻脚又行唔到，唉，我都唔想架。。。

其實都係有啲人好鍾意攞別人著數，例如我住係東涌嘅話，返機塲工，啲老細就要你做primary support。喂，我住得近唔係為support 架！

不過單身真係有度好，無人管，好free! 算啦，我都係呻吓啫。

To Mother - YUI

Yui 有新曲啦！好好聽呀。呢首歌寫比媽媽，歌曲好優美，好温柔，最鍾意最後個句。

"我覺得幸福大概是我因為有你" - To 我的媽媽

YUI首次用鋼琴唱歌，無左平時個激情演出。初初聽有啲唔慣，聽多幾次再加埋睇歌詞就覺得好好聽。因為唔識日文，聽佢啲歌要睇歌詞，之後會着左迷。

又要儲錢買碟啦 :D

16th Single
『to Mother』　/　YUI
作詞・作曲 / YUI

＜初回生産限定盤＞
CD + DVD
SRCL-7271～72 ￥1,575 (tax in )

＜通常盤＞
CD Only
SRCL-7273 ￥1,223 (tax in )

2010/06/02 出版

註：圖片連結自Staff Diary

IPhone OS 4.0

前幾日Apple出左i-Phone OS version 4.0. 我睇左Job先生嘅Keynote。

好多人其待嘅 multi-tasking 終於係第四代出現了。我讚嘅係佢地可以設計到轉App同轉頁一樣咁易，按两下肚臍就彈出現在行緊嘅App。左右掃去揾想轉嘅App，同而家UI Guideline一樣，好易上手。

其次就係加Folder呢個設計，用drag-n-drop 加自動配 folder名。好！

仲可以放係main bar度。利害。

最後俾我更大嘅驚喜就係 iAd 喇。如果話iPad改變出版界，食Amazon Kindle地盤，咁iAd應該會改變廣告界了。活動嘅廣告加即玩即買嘅概念幾好，睇嚟想食理Google個地盤。

重有其他新工能如 thread mail, ibook 等。

最後就係可以俾啲大機構用wifi 或者 3G 咁去發佈同更新App， 可以不經人手，睇吓我公司用唔用到呢。（我唸十年後可能得。。。。）

啲相係取自keynote 的。

鮑魚、龍蝦、燕窩餐 ﹣ 陶源酒家

朋友L話近日去陶源酒家二佰零蚊食鮑魚，於是上網揾吓四月有冇discount，唸住同阿媽去嘆吓。網上話要388每位， 有以下菜色。打電話去訂位個女侍應話訂位每位198，於是加上64蚊要南非鮑魚。

御前二小品 （滬江素鵝．法式燴鴨胸）

黒松露花膠燴燕窩

蠔皇鮮鮑魚伴玉掌

高湯焗乳龍蝦 （半隻）

翠盞龍躉球

火龍藏錦綉

燕麥素皇包

鮮果拼盆

二小品不過不失，我只係覺得素鵝好油，可能我減肥了一段時間無食油膩野啦 。

黑松露同燕窩都唔係咁多，不過好多蟹肉係碗羹裏面。第一次食黑松露覺得好香啊！

跟住上主菜，先有一杯檸檬楊桃汁去開脷（唔係開胃lol）。嗰鮑魚好彈牙，大細有一個鎖匙包咁大，可以用刀义去品嘗。好味，鵝掌俾左老媽子吃，我見佢食晒，我唸好味笟。

龍蝦仔都好大隻，好新鮮，好味，我食左两大隻。（因老媽子唔食 )

龍躉球其實係龍躉扒（其實係唔知係咪真係龍躉，我係魚白痴），配左比雞醬辣小小嘅醬，感覺一流。好！

火龍藏錦綉都有驚喜呀，火龍果肉加爽口嘅菇絲（唔記得問係乜菇呀，囧）同青椒，好清新！

燕麥素皇包原來有野係裏面，都唔錯。

整體表現好好，待應態度都幾好（可能人不太多）。埋單前睇吓其他鮑魚嘅價錢，嘩，三千幾蚊食一隻十頭日本吉品鮑，真係富豪先食得起。令我記起好多年前朋友I小姐請我食個一隻大鮑魚，就算係南非鮑都要888一隻，真係要多謝多N次先得。

埋單要928大元，好似計多左二十蚊

評分：85 ( 扣五分因計多左二十蚊）

PS）到左之後唸住唔夠食，重唸住叫八大名菜中嘅冰燒三層肉同脆皮咕嚕肉。點知食完第四道菜已經飽到七成，原因係每道菜都係一人一份（第一道例外）。

Super Street Fighter 4

今日在網上（i-gamer)買左SSFIV喇，要288大元。有下載碼買野，wakaka! 原本唸住係HMV買，但係要309仲要加18蚊郵費，頂！

其實我想買DOJO 版，但係都唔知點買，唯有買最平嗰版。COLLECTOR 版就真係買唔過，多隻DVD 有MOVIE但係全部都可以上網睇，真係好鍾意佢先得(仲要有錢 :p)。

仲有四月十四日會出Final Fight Double Impact。好吸引呀。好想玩，但係要俾80大洋。CAPCOM真係識得揾銀。但點都比KOEI好，嗰個北斗無雙要540大元。死咩，雖然我好鍾意健次郎打完北斗殘悔拳之後嗰句“你已經死了”。好型，但係真過唔到自己良心。不過朋友B真係好有米，唸都唔使唸仲買埋COLLECTOR版900大元。。。。。

最危險的厠所與最美的星空

在看志明與春嬌之前，到Kubrick走了一趟。好多書都係文學作品，不太啱我這個懶人看。例如我看見兩大本厚厚的1Q84，我就知道無論多好看，我是會看不完的。在入門口的右手面，給我發現有我有興趣的書 ，旅遊書，飲食書等 （其實我想揾啲社會意識形態，心理，行為嘅書）。

今次看嘅書係以下這本：

本書係日本人用七年半時間騎單車環遊世界，例出作者認為最好，最壞嘅地方。不是一味看風景好，有各地民生，食物，好客，美女(:P) ，厠所！我都係俾呢個世界最危險厠所吸引，所以買來看看。其次係要係復活節返中山，知道會有點無聊，所以買本書打發時間。

第一頁有世界地圖點名每個世界之最，可以跟自己興趣跳頁來看。我就選擇由頭看到尾。看完後，我覺得這本書鋪排上有點混亂，不是跟住個地圖來講，所以跳頁來看可能更好吧。令我最衝動想去就係蒂卡爾遺跡，好想看看在塔上雲海，晨光，一望無際的嘅叢林，好有無限幻想。

另外，我就好有興趣去越南食"che" 。如果好食，把佢帶返香港睇吓買唔買得。:)

仲有就係作者竟然可以用手去解決開大事嘅勇氣，人嘅潛能真係無限 ！

其實我好同意作者所説，每人對每個地方嘅體會感受會有不同，每人心中最好都有不同，唔同時侯，唔同心情，同唔同人一起，都有不同感覺嘅。不過我真係好想去吓世界各地呀，我要快啲好返！orz....

評分：70

馴龍記

今日物理治療之後見無野做，時間尚早 （五點幾），去左黃埔睇馴龍記 粵語版 （我想睇英文呀！）點知最早嗰場係八點，唯有係珊瑚堡食飯，貪佢可以坐耐啲。買飛嗰陣俾左張宣傳單張我，有Dark Chocolate Orange 味嘅Haagen-Dazs ，買左杯一路睇戲一路食，好正呀。啲雪糕裏面有粒粒橙，口感同味道都好特別，唯一係啲朱古力唔係好dark （應該係唔dark） 。

夢工塲嘅作品不錯，啲3D係我見最好一套，比avatar更好。開頭公司logo已經有驚喜。戲嘅內容係講維京人同龍打左好多年，不斷殺來殺去，其中村長嗰仔係村中最差嗰個人。有一日佢打低左條龍，無意發現龍其實無心去殺人，只係為左生存，先捉人 。

呢套戲有意俾人知別人做事必有因，要明白別人用意，要用别人的角度去唸，先可以解決問題。(美國人知道咁，點解仲迫人做野 :( ) 另外，做老豆嘅如果發現自己唔啱，會去say sorry ， 香港人有幾多可以做到呢？

令我驚喜係啲配音都唔錯。Juno 幾好呀，都唔明點解啲人（係影評）一見就話佢唔得。

評分 ： 85

火龍

復活節，朋友打電話來問有冇時間吃飯，其時老頭子已買飯去，我直接説我在吃了。朋友提議去睇戲，於是到網上同 iphone 去睇吓有乜野好睇，見火龍有四粒星，於是到葵芳新都會買飛。開八點，有時間就走去 Starbuck 飲左杯大(genade) mocha. 好大杯呀！

葵芳百老滙啲位無荃灣咁正，會比前面嘅高大威阻住。:(

講返套戲 （我成日吹水，唔好意思），劇情係黎明死左老婆（開頭唔知點死，跟住一啲啲咁係黎明回憶中重組返），日日都掛住揾殺老婆嘅兇手，捉賊嘅手段好激。有日有一個妓女死左，黎明覺得（我唸）可能同自己老婆嘅兇手有關，其間任賢齊話自己有單案要黎明幫手，順手跟埋妓女單野。點知妓女單野係一幫有重火力嘅賊，黎明同另外一team重案一起唸住捉人，點知俾人炸到飛起。我心唸如果係我早就call SDU 啦 :P 。

黎明有唔錯嘅表現，廖啟智當然好啦。我就好唔慣任賢齊個做型，好怪。最令我有震撼感嘅係其中內地同胞俾炸到灰飛煙滅同黎明老婆死果幕，令我覺得人係好化學，要死，可以好無預料之下就死架啦。同埋，啲賊真係咁無人性，好想打“九”佢。

雖然話两個主角都係屬龍，但係我覺得其實同套戲名無乜關係，係最後整係舞龍出來，真係有啲勉强。

評分： 75.

志明與春嬌

因為好多人都話“志明與春嬌”好睇，影評都有四粒星，所以尋晚就買左飛兩點睇。點知尋晚可能飲大左(两杯咖啡:P)，搞到成晚訓唔著，起身脚仔軟無乜力，

但係金錢嘅力量真大，始終都搭車去睇。

好， 講返套戲，有好多人話好好笑，我又覺得其實只有五成地方真係好好笑。

我唔食煙，所以唔知啲人係咪真係咁多粗口，不過一定有好多野聽到。

所以我都要得陪老細食吓煙先，我飲可樂。

我唸好多女性都好“lum"志明同春嬌係酒店講個句：

“有好多野唔係要一日裏面做晒，我地有好多時間”

﹣ 等我記住佢以後用(其實..係咪真係..可以咁..懸崖勒馬呀呀..............)

令外宜家啲後生仔都好唔俾面人，成日都“小”返人，又話關你x事，我唸我真係out晒。

我都已經好市井，屋村仔一名，都唔會咁。唉。

如果你有五年嘅男／女朋友，識左咁多年好多人都會有依賴性，乜都到左奉旨。

會唔會去轉新朋友，啱channel係好重要，但係你又點知新嗰個會唔會都係咁。

如果係咪大檸樂！

片尾都幫返政府叫人戒煙。

不過呢套戲最令我驚喜係谷得昭最後两段小片：

http://www.youtube.com/watch?v=UALxRQNYQZg (小孩勿看）

評分：80 （5 分比谷得昭）