打擂台

打擂台係唔係Cult，我評唔到，一向無呢啲Sense。剩係知係呢套戲好有教育，無論八十前如我或現在八、九十後，睇完都應該有收獲。套戲有好的武打塲面，真係真功夫架，不比葉問差，仲有卡通feel，好正！

套戲都有好多笑位，不過唔明點解一講粗口就有人笑，未聽過？

我有两句説話係最深刻：

1. 唔打咪唔會輸，要打就一定要贏
2. It is not about how hard you can hit, it is about how hard you can get hit and keep moving forward

初初泰迪羅賓講“唔打咪唔會輸，要打就一定要贏”都唔知點解，睇完最後先知，做事要盡全力，不計成敗，明知必敗，只要有心有勇氣，向前衝，向自己目標進發。做每件事不是對人，是對自己有所交待，只要過程，不問收獲。無論環璄幾差，我們都要用自己的拳頭，打出天下，開創自己的道路。

第二句有相同的意義，對我來説更合時，我要努力去overcome依家隻脚的痛楚（不過真係好x痛) ，keep moving forward! 其實呢句係Rocky有出過架！

評分：85

PS＞今日見入塲人仕有男有女，青年老年，有啲公公婆婆攞住拐杖去睇，真係少見。

另外手痕買左呢两隻VCD @@.

維多利亞壹號(三級)

尋日朋友得閒，問我有乜戲好睇，我建議不如睇維多利亞壹號啦。我和友人都好怕睇恐怖片架，不過我又睇左葉問2，無其他選擇之下才睇的。原本見啲評分係3星度，仲要60蚊，無乜其望，但睇完之後覺得好好睇呀！有興趣看嘅朋友請移玉步到戲院買飛，不要看本文。

套戲講何超儀自小住喺啲舊區，屋企地方好細，所以由細到大的願望係買樓，仲要望海，一心睇中維多利亞壹號望海單位8B。當時喺07年樓市好景時間，八千蚊尺啊何超都買（Hardsell 同名樓盤？）原本儲夠錢可以買，但業主加價，以至佢short左，走去殺人。

成套戲有好多血腥畫面，啲血喺咁不停噴出來。拍攝手法用倒敍加殺人敍去描述主角心情同殺人動機。一開始就殺左個警衛，呢個無關係，但令我感到之後成套都係咁殘忍。以下一次過列出殺人事件：

1. 警衛大口青:cutter自插大動脈死
2. 8A單位賓妹:從後腦插穿眼死
3. 8A單位女主人葉璇(大肚):俾何超儀拉低，壓住大肚出羊來後再俾真空吸綿被袋笠死
4. 8A單位主人單立文:打完Golf回家，和何超糾纏中跌死
5. 陳偉雄:被割破肚皮及數隻手指，大小腸溢出，但未即時死去
6. 曾國祥:毒品玻璃瓶插頸而死
7. 妓女宋小澄(好靚):俾何超儀撼爆坐廁而死
8. 周俊偉:同妓女周楚楚玩推車時，俾何超儀從背後身中多刀而死，再被切jerjer(好大碌haha)
9. 妓女周楚楚:口被插床板木條，未死得晒，之後混亂中跌倒被木條插穿後腦而死
10. 差佬Juno:槍擊走火混亂中，面部中槍大量出血，再被何超儀係大陽穴補一槍
11. 差佬駱應鈞:同周楚楚糾纏中，被周楚楚割破頸部，大量出血而死

套戲其實都好好笑架(我覺得好過志明與春嬌)，以下例子：

1. 两個小朋友用對講杯由每句Over到每句仆街
2. 曾國祥解釋周俊偉唔玩3P嘅原因
3. 何超儀去時鐘酒店睇電視，全部都係鹹片
4. 周俊偉被切jerjer，妓女周楚楚話你好多呀
5. 陳偉雄被割破肚皮後仲要食煙
6. 陳偉雄被何超儀補一槍後嘅死樣

另外，有好多爭議性的事，如何超儀要俾首期，連自己老豆都殺，仲要攞埋啲保險金去買樓，真係咁無人性？明知男朋友有老婆都同佢一齊，成為其泄欲工具？話時話，我自己覺得何超儀殺人動機係想有人命事件令樓價下跌。另外，我和朋友都一致覺得何超儀好靚，好有眛力！

評分：88 （推介）

Iron Man 2 鐵甲奇俠2

今日好天氣真好，老早約左朋友L去睇Iron Man 2。上網check 左唔係咁多人（一點嗰塲，早塲一早沽清>.<），於是去到先買飛喇。

之前Iron Man 我無睇過，所以無乜其待。套戲講 Tony Stark (Iron man) 自從出左名之後，美國政客話國家安全，要佢交返套鐵甲出來奉獻俾國家（一貫大美國主義，仲衰過共產主義！）佢當然唔俾，仲好寸咁話自己嘅科技俾其他人快五至十年。點知佢老豆之前個partner嘅仔又整一套出來，搞到好大鑊。佢又因為中毒（鈈中毒，Iron Man 套野嘅能源），成個人傻傻地。佢個friend 頂佢唔順，攞左佢套鐵甲俾國家。最後軍方整左成支Iron Man 無人駕駛軍隊出來，但俾人種左程式。於是一塲大戰就開始。

如果你喜歡美國Super Hero，都好好睇嘅。，不過套戲有好多塲吹水戲，有啲悶。两位女主角啲戲都唔知要來做乜，但佢地两個都好正！Gwyneth Paltrow 好正呀，Scarlett Johansson好索呀！最後個塲啲無人駕駛軍隊飛來飛去睇到有點想走。

我有好多地方唔明，個主角係屋企整到粒子機？咁容易揾到新Element? 有人可以咁易hack到system咁不如遙控核彈好過？！嗰Iron Man能源咁勁，仲有十幾廿件，自爆起應該可以摧毀成個市或者省喇。睇故唔好駁故係無錯！好似個個人都去到主角嘅研究室，自出自入？俾多廿年都做唔到咁樣用手去access個system...lol

其實Scarlett嗰塲打鬥係特別加俾佢表演上位。勁多大頭！

啲音響真係好正，要係戲院先有呢種感覺。

評分：75 （可以一看）

相片連自Apple

Kick-ass 勁揪俠

見到hkmovie 啲影評話勁揪俠好睇 (有四粒星），好笑，加埋荃灣百老滙＄35蚊仲要十一點九有早塲，於是今日走左去睇。

故事（改自同名漫畫）講一個傻仔成日唸住扮超人，係網上買左套青BB嘅緊身衣週街去幫人。（點敢著住嗰套野出街呀？？）又無料，幾乎死係黑幫手上，但係遇到hitgirl 同 big-dad 幫手。其實 big-dad 同班黑幫有恩怨，成日搞到黑幫生意做唔成。黑幫大佬同佢個仔（扮red-mist)，big-dad，hitgirl 有一塲大戰。

其實唔係好多塲面好笑（要聽英文先會好笑啲），這方面有啲失望。不過槍戰同打塲面比左心機去做。套戲係三級因為啲打鬥塲面都好血腥吓，我都睇到有啲驚。內容就預左無內涵，無無聊聊，無驚喜。比較好係Chloe Moretz飾演嘅Hitgirl，好多打鬥都做到好好，同最後俾人打到死死吓咁都演得唔錯。另外，我都好鍾意Red-Mist嗰做型！

套戲有啲長得滯，都唔明開頭主角俾人車到飛起有乜用，唔通剩係表達佢係gay? Nicolas Cage 嗰做型好明顯抄batman架喎，唔驚俾人告？相信套戲會有續集，冇乜興趣。

反而睇到IRONMAN 2 預告好吸引，應該會去睇。唔係3D有多啲興趣。

相片來自勁揪俠官網。

評分 ： 60 （如果唔係＄35蚊，我唔會去睇）

馴龍記

今日物理治療之後見無野做，時間尚早 （五點幾），去左黃埔睇馴龍記 粵語版 （我想睇英文呀！）點知最早嗰場係八點，唯有係珊瑚堡食飯，貪佢可以坐耐啲。買飛嗰陣俾左張宣傳單張我，有Dark Chocolate Orange 味嘅Haagen-Dazs ，買左杯一路睇戲一路食，好正呀。啲雪糕裏面有粒粒橙，口感同味道都好特別，唯一係啲朱古力唔係好dark （應該係唔dark） 。

夢工塲嘅作品不錯，啲3D係我見最好一套，比avatar更好。開頭公司logo已經有驚喜。戲嘅內容係講維京人同龍打左好多年，不斷殺來殺去，其中村長嗰仔係村中最差嗰個人。有一日佢打低左條龍，無意發現龍其實無心去殺人，只係為左生存，先捉人 。

呢套戲有意俾人知別人做事必有因，要明白別人用意，要用别人的角度去唸，先可以解決問題。(美國人知道咁，點解仲迫人做野 :( ) 另外，做老豆嘅如果發現自己唔啱，會去say sorry ， 香港人有幾多可以做到呢？

令我驚喜係啲配音都唔錯。Juno 幾好呀，都唔明點解啲人（係影評）一見就話佢唔得。

評分 ： 85

火龍

復活節，朋友打電話來問有冇時間吃飯，其時老頭子已買飯去，我直接説我在吃了。朋友提議去睇戲，於是到網上同 iphone 去睇吓有乜野好睇，見火龍有四粒星，於是到葵芳新都會買飛。開八點，有時間就走去 Starbuck 飲左杯大(genade) mocha. 好大杯呀！

葵芳百老滙啲位無荃灣咁正，會比前面嘅高大威阻住。:(

講返套戲 （我成日吹水，唔好意思），劇情係黎明死左老婆（開頭唔知點死，跟住一啲啲咁係黎明回憶中重組返），日日都掛住揾殺老婆嘅兇手，捉賊嘅手段好激。有日有一個妓女死左，黎明覺得（我唸）可能同自己老婆嘅兇手有關，其間任賢齊話自己有單案要黎明幫手，順手跟埋妓女單野。點知妓女單野係一幫有重火力嘅賊，黎明同另外一team重案一起唸住捉人，點知俾人炸到飛起。我心唸如果係我早就call SDU 啦 :P 。

黎明有唔錯嘅表現，廖啟智當然好啦。我就好唔慣任賢齊個做型，好怪。最令我有震撼感嘅係其中內地同胞俾炸到灰飛煙滅同黎明老婆死果幕，令我覺得人係好化學，要死，可以好無預料之下就死架啦。同埋，啲賊真係咁無人性，好想打“九”佢。

雖然話两個主角都係屬龍，但係我覺得其實同套戲名無乜關係，係最後整係舞龍出來，真係有啲勉强。

評分： 75.

志明與春嬌

因為好多人都話“志明與春嬌”好睇，影評都有四粒星，所以尋晚就買左飛兩點睇。點知尋晚可能飲大左(两杯咖啡:P)，搞到成晚訓唔著，起身脚仔軟無乜力，

但係金錢嘅力量真大，始終都搭車去睇。

好， 講返套戲，有好多人話好好笑，我又覺得其實只有五成地方真係好好笑。

我唔食煙，所以唔知啲人係咪真係咁多粗口，不過一定有好多野聽到。

所以我都要得陪老細食吓煙先，我飲可樂。

我唸好多女性都好“lum"志明同春嬌係酒店講個句：

“有好多野唔係要一日裏面做晒，我地有好多時間”

﹣ 等我記住佢以後用(其實..係咪真係..可以咁..懸崖勒馬呀呀..............)

令外宜家啲後生仔都好唔俾面人，成日都“小”返人，又話關你x事，我唸我真係out晒。

我都已經好市井，屋村仔一名，都唔會咁。唉。

如果你有五年嘅男／女朋友，識左咁多年好多人都會有依賴性，乜都到左奉旨。

會唔會去轉新朋友，啱channel係好重要，但係你又點知新嗰個會唔會都係咁。

如果係咪大檸樂！

片尾都幫返政府叫人戒煙。

不過呢套戲最令我驚喜係谷得昭最後两段小片：

http://www.youtube.com/watch?v=UALxRQNYQZg (小孩勿看）

評分：80 （5 分比谷得昭）